साँफेबगरमा ‘मेयरसँग बाल संवाद’ : बालबालिकाले जनप्रतिनिधिसामु राखे बालविवाहदेखि विद्यालय पूर्वाधारसम्मका सवाल
जेठ १२ अछाम
साँफेबगर नगरपालिकामा बालबालिकासँग जनप्रतिनिधिको खुला संवाद कार्यक्रम सम्पन्न भएको छ । बाल अधिकार, सहभागिता र सुरक्षित भविष्यका विषयमा केन्द्रित “मेयरसँग बाल संवाद” कार्यक्रम पालिका स्तरीय बाल सञ्जालको आयोजना, वल्र्ड भिजन इन्टरनेशनल नेपालको सहयोग तथा आस्था नेपालको समन्वयमा गरिएको हो ।
कार्यक्रममा बालबालिकाले स्थानीय तहमा देखिएका समस्या, नीति तथा कार्यक्रम कार्यान्वयनको अवस्था तथा आफ्नो दैनिक जीवनसँग सम्बन्धित विषयमा जनप्रतिनिधिलाई प्रत्यक्ष प्रश्न गरेका थिए । वडा नं. ४ मष्टामाण्डौंकी १६ वर्षीया पुस्तिका बुढाले बढ्दो बालविवाह रोक्न नगरपालिकाले सञ्चालन गरिरहेका कार्यक्रमबारे प्रश्न गर्दै औपचारिक कार्यक्रमले मात्रै समस्या समाधान नहुने बताइन् । उनले बालविवाह न्यूनीकरणका लागि व्यवहारिक र प्रभावकारी कदम आवश्यक रहेको धारणा राखिन् ।
त्यस्तै वडा नं. ९ का जीवन कुँवरले नगरपालिकामा स्थापना गरिएको बाल कोषमार्फत बालबालिकाका क्षेत्रमा भएका गतिविधिबारे जिज्ञासा राखेका थिए । कार्यक्रममा सहभागी अन्य बालबालिकाले विद्यालयमा आधारभूत पूर्वाधारको अभाव रहेको गुनासो गरे । उनीहरूले विद्यालयमा व्यवस्थित खानेपानी, खेलमैदान तथा खेल सामग्री, सेनेटरी प्याड व्यवस्थापन र छात्रामैत्री शौचालयको अभाव तत्काल समाधान गर्नुपर्ने माग गरेका थिए ।
पालिका स्तरीय बाल सञ्जालकी अध्यक्ष जेनिशा भाटले आगामी आर्थिक वर्षको बजेट निर्माण गर्दा बालबालिकाका सवाललाई प्राथमिकतामा राख्नुपर्ने बताइन् । उनले लागुऔषध दुव्र्यसन न्यूनीकरण, मर्यादित महिनावारी, बालविवाह रोकथाम, छुवाछुत न्यूनीकरण तथा खेलकुद सामग्री व्यवस्थापनका कार्यक्रम प्रभावकारी रूपमा समेटिनुपर्ने सुझाव दिइन् ।
महिला तथा बालबालिका शाखा प्रमुख अनिता जोशीले बालविवाह न्यूनीकरणका लागि सडक नाटक, सचेतनामूलक कार्यक्रम तथा लैङ्गिक हिंसा न्यूनीकरणसम्बन्धी अभियान सञ्चालन गरिने जानकारी दिइन् । उनका अनुसार बाल अधिकार संरक्षणका लागि समुदायस्तरमै सचेतना विस्तार गर्ने कार्यलाई निरन्तरता दिइनेछ ।
स्वास्थ्य शाखा प्रमुख लक्ष्मण योगीले लागुऔषध सेवनले बालबालिका तथा युवाको शारीरिक, मानसिक स्वास्थ्य, अध्ययन र भविष्यमा गम्भीर असर पार्ने बताउँदै समयमै सचेत हुनुपर्ने आवश्यकता औँल्याए । शिक्षा शाखा प्रमुख हिरादत्त भट्टले विद्यालयका शौचालयमा पानीको व्यवस्था, सेनेटरी प्याड डिस्पोजल, प्रधानाध्यापकको नियमित उपस्थिति तथा कम्प्युटर मर्मतलगायतका समस्या समाधानका लागि नगरपालिकाले आवश्यक पहल गर्ने बताए ।
नगर उपप्रमुख शिवबहादुर कुँवरले बालबालिकाबाट उठाइएका समस्या र सुझावलाई नगरपालिकाले गम्भीर रूपमा लिएको बताउँदै आवश्यक नीति तथा कार्यक्रममार्फत समाधानका लागि पहल गरिने प्रतिबद्धता जनाए । उनले बालबालिकाको सहभागिताले स्थानीय सरकारलाई अझ जिम्मेवार बनाउने धारणा राखे ।
कार्यक्रमको सहजीकरण रेडियो जनप्रिय एफएमका कार्यकारी निर्देशक तपेन्द्र कुँवर र आस्था नेपालका फिल्ड सुपरभाइजर भ्वान सिंह सार्कीले गरेका थिए ।
चौरपाटी–७ मार्कुलाई ‘प्लास्टिक मुक्त वडा’ बनाउने सामूहिक प्रतिबद्धता
तपेन्द्र कुँवर चौरपाटी–७ की स्थानीय अनिशा देवी बोगटी केही वर्षअघिसम्म गाउँघरमा प्लास्टिक जलाउने र जथाभावी फाल्ने चलन सामान्य रहेको सम्झनुहुन्छ।
काठमाडौँमा उपचारका क्रममा चौरपाटीका युवा डिल्लीराज साउँदको मृत्यु
चौरपाटी गाउँपालिका–३ गगुडाका युवा डिल्लीराज साउँदको काठमाडौँमा उपचारका क्रममा निधन भएको छ। साउँद दुई दिनअघि मात्रै मोटरसाइकलमार्फत लामो यात्रा
संगठन सुदृढीकरणमा जुट्यो नेकपा अछाम, गाउँ–गाउँमा एकता अभियान
तपेन्द्र कुँवर नेपाली कम्युनिष्ट पार्टी (नेकपा) अछामले पार्टी एकतालाई संगठन विस्तारसँग जोड्दै पालिकादेखि वडा तहसम्म संगठन सुदृढीकरण अभियानलाई
प्रतिकृया दिनुहोस